• منور میری آنکھوں کو میرے شمس الضحی' کر دے
  • غموں کی دھوپ میں وہ سایہ زلف دوتا کر دے

  • جہاں بانی عطا کر دیں بھری جنت ہبہ کر دے
  • نبی مختار_کل ہیں جسے جو چاہیں عطا کر دے

  • جہاں میں ان کی چلتی ہے وہ دم میں کیا سے کیا کر دے
  • زمیں کو آسماں کر دیں ثریا کو ثری' کر دے

  • جہاں میں اڑنے والے یوں نہ اترائیں ندا کر دے
  • وہ جب چاہیں جسے چاہیں اسے فرماں روا کر دے

  • ہر اک موج بلا کو میرے مولا ناخدا کر دے
  • میری مشکل کو یوں آساں میرے مشکل کشا کر دے

  • عطا ہو بے خودی مجھ کو خودی میری ہوا کر دے
  • مجھے یوں اپنی الفت میں میرے مولا فنا کر دے

  • جہاں میں عام پیغام شہ احمد رضا کر دے
  • پلٹ کر پیچھے دیکھیں پھر سے تجدید وفا کر دے

  • نبیﷺ سے ہو جو بیگانہ اسے دل سے جدا کر دے
  • پدا، مادر، برادر، مال و جاں ان پر فدا کر دے

  • تبسم سے گماں گزرے شب تاریک پر دن کا
  • ضیاء_رخ سے دیواروں کو روشن آئینہ کر دے

  • کسی کو وہ ہنساتے ہیں کسی کو وہ رلاتے ہیں
  • وہ یونہی آزماتے ہیں وہ اب تو فیصلہ کر دے

  • گل طیبہ میں مل جاوں گلوں میں مل کے کھل جاوں
  • حیات_جاودانی سے مجھے یوں آشنا کر دے

  • یہ دور آزمائش ہے انہیں منظور ہے جب تک
  • نہ چاہیں تو ابھی وہ ختم دور ابتلا کر دے

  • سگ آوارہ صحرا سے اکتا سی گئی دنیا
  • بچاو اب زمانے کا سگان مصطفیﷺ کر دے

  • زمانہ خوگر مے ہے نئی مے کی ضرورت ہے
  • پلا کر اپنی نظروں سے وہ تجدید_نشہ کر دے

  • مجھے کیا فکر ہو اختر میرے یاور ہیں وہ یاور
  • بلاوں کو جو میری خود گرفتار بلا کر دے