اساں کلھیں پڑھ پڑھ انج تھی گئیوں جْل کہیں دے کول نماز پڑھوں

ہتھ بدھ بھاویں ہتھ کھول پڑھوں اے پھول نہ پھول نماز پڑھوں

ہتھ تسبی مسجد رقص کروں پا گل وچ دول نماز پڑھوں

جتھ طارق دڑکے نہ ہوون او مسجد گول نماز پڑھوں


حال نہ پچھ بے حال نہ کر میں دردیں دا دفتر ہاں

ڈاج ہاں لٹی بنری دا کہیں اجڑیے گھر دا در ہاں

چھورے بال دا پاڑیا چولا اْتو ننگا سر ہاں

طارق چمن ویران دا بلبل مدتاں توں بے پر ہاں


ودے اپنڑے آپ توں پچھدے ہیں

جیڑھا روز جگیندے کون ہوسی

ہر دھمدی رات دے متھڑے تے

رنگ لال پھریندے کون ہوسی

کڈی مسجد خبطہ پڑھدا ہے

کڈی بین وجیندے کون ہوسی

انڑ سونہاں طارق سونہا ں ہے

ناں گھن الویندے کون ہوسی

کہیں حال ڈتے لجپال مٹھا

گئے جھوک لڈا شالا کُوڑ ھووے

اے پاگل دل! بے ہوش نہ تھی، ذرا آپ کوں جھل ، کل آ ویسی

کل سِجھ دا وعدہ کر گئے چن ، من کہیں دی گل ، کل آ ویسی

شالا خیر ہووِس ، تھیسی خیر دا ڈینہہ ،بہسوں رست مل ، کل آ ویسی

اجاں اج تاں طارق ویندا پئے کل لہسی کل ، کل آ ویسی


تیڈی چھاں تے پلدے پئے ہاسے کر پاسہ گئیں چن دْھپ کیتی

بس لکدا چھپدا دیکھ تیکوں میڈا سیت وہ گئے لک چھپ کیتی

چن چاندڑیاں چٹیاں ڈد ھ راتیں گئیں قہر دیاں کالیاں گھپ کیتی

ادھ بزم دے طارق بین والے اج بیٹھوں چُنڈ اِچ چپ کیتی

اٹھی سینگی جاگ سیانی تھی نہ اتنی نندر پیاری کر

پئی سارا گھر خیلان تھیا کوئی تھاں دھو انگڑ بوہاری کر

ہن سر ڈوپہر خمار کوں سٹ، بے کار نہ تھی کوئی کاری کر

میڈے سر دے والی وارث ہو، تساں والیاں کوں میں کیا آکھاں

میڈے سیئت وی اﷲ والے ہن، اﷲ والیاں کوں میں کیاآکھاں

کن والیاں تیڈا پچھدیاں ہن، کن والیاں کوں میں کیا آکھاں

توں طارق دھنولا چاتی گئیں، لسی والیاں کوں میں کیاآکھاں


توں ساڈا بنڑ نہ بنڑ دلبر ہے گالھ صفا اساں تیڈڑے ہیں

ڈے جام وصال دے بھر ساکوں یا زہر پلا اساں تیڈڑے ہیں

ساڈے ڈوہیں ہتھ ہن اکھیاں تے جہیں قسم چوا اساں تیڈڑے ہیں

رکھ آپ غلامی وچ شاکر یا ویچ وٹا ، اساں تیڈڑیہیں


بھلا خوشیاں کہیں کوں چک پیندن ، کوئی خوشی ٹھکرا پتہ لگ ویندے

جیڑھی چیخ پکار کوں پھند اہدیں ایہو توں چا پنڑا پتہ لگ ویندے

جے روونڑ اپڑیں وس ہوندے توں رو ڈکھلا پتہ لگ ویندے

جویں عمر نبھی ہے شاکر دی ، ہک منٹ نبھا پتہ لگ ویندے