کُجھ عرصہ اندھے چور وانگوں اونکوں پیار کریندے رہ گئے ہیں​

کئی سال ولا اظہار کیتے ، الفاظ گولیندے رہ گئے ہیں​

ول موقع محل دی تاڑ دے وچ، کُجھ وقت ونجیندے رہ گئے ہیں​

سِوی شاکرؔ کھٹ کوں چٹ گئی ہے اساں وانڑ وٹیندے رہ گئے ہیں


ونج قاصد یار دے بوہے کوں کھڑکاویں ہولے ہولے​

متاں نندر ہووے میڈے دلبرکوں جگواویں ہولے ہولے 

جڈاں نندروں یار سجاک تھیوے، الواویں ہولے ہولے

پچھے حال حویلہ شاکر دا سنڑواویں ہولے ہولے​​


سجن تھی گئے قاصد خفا ہولے ہولے

توں ونج کہیں طرحاں آ منا ہولے ہولے


گیوں کیویں قاصد ولیں کیہڑے حالوں

میرے نیڑے آ بہہ ڈسا ہولے ہولے


تیرا رخ دسیندا اے خبر بھیڑی جا آیا ایں

سُنا تاں سہی‌ پر سُنا ہولے ہولے


زمانہ جو آہدا اے وفا نہ کریسیا

توں کنوں تاں چن دے کڈھا ہولے ہولے


توں آویں نہ آویں دلاسا تاں دے چا

اس دل کوں میں گھنساں رَہا ہولے ہولے


خبر دل کوں ہووے نہ تیرے ونجن دی

کھسک ونج توں ڈھولا ذرا ہولے ہولے


کرو بھج دھرک تے مسلمانو پکڑو

جو منہ کیتی ویندی حیا ہولے ہولے


ہٹک ڈے اس دل کو نہ جا جا تے تلکے

ادب عشق دا کُجھ سکھا ہولے ہولے


اثر ہے دعا دا جو دکھ ٹل گئے شاکر

کرم کیتی آندا اے خدا ہولے ہولے​


فکر دا سجھ ابھردا ہئے سوچیندیاں شام تھی ویندی​

خیالیں وچ سکون اجکل گولیندیاں شام تھی ویندی​

​

انھاں دے بال ساری رات روندین، بُھک توں سُمدے نئی​

جنھاں دی کہیں دے بالاں کوں کھڈیندیاں شام تھی ویندی​

​

غریباں دی دعا یارب خبر نہیں کن کریندا ہیں​

سدا ہنجوؤاں دی تسبیح کُوں پھریندیاں شام تھی ویندی​

​

کڈھیں تاں دُکھ وی ٹل ویسن کڈھیں تاں سکھ دے ساہ ولسن​

پُلا خالی خیالاں دے پکیندیاں شام تھی ویندی​

​

میڈا رازق رعایت کر نمازاں رات دیاں کردے​

جو روٹی رات دی پوری کریندیاں شام تھی ویندی​

​

میں شاکر بُھک دا ماریا ہاں مگر حاتم تُوں گھٹ کائینی​

قلم خیرات میڈی ہے چلیندیاں شام تھی ویندی


​آج (6 ستمبر 2012) یوم دفاع پر شاکر کی خوبصورت شاعری پیش خدمت ہے۔ جس میں شاکر نے لوگوں کو عمل کا پیغام دیا ہے۔​

​

اے پاکستان دے لوکو ! پلیتیاں کوُں مٹا ڈیوؤ​

نتاں اے جئیں وی ناں رکھئے، اے ناں اوں کوں ولا ڈیوؤ​

​

جتھاں مخلص نمازی ہنِ اُو مسجد وی ہے بیت اللہ​

جو مُلاّں دے دکاناں ہنِ مسیتاں کوں ڈہا ڈیوؤ​

​

اُتے انصاف دا پرچم تلے انصاف وِکدا پئے​

اِیہو جئیں ہر عدالت کُوں بمع عملہ اُڈہ ڈیوؤ​

​

پڑھو رحٰمن دا کلمہ بنڑوں شیطان دے چیلے​

منافق توُں تاں بہتر ہےِ جو کافر ناں رکھا ڈیوؤ​

​

جے سچ آکھنڑ بغاوت ہےِ بغاوت ناں ہےِ شاکر دا​

چڑھاؤ نیزے تے سر بھانویں میڈے

خیمے جلا ڈیوؤ​

​




​