مینوں مجبوریاں تے دوریاں نے ماریا

سد لو مدینے  آقا  ﷺ   کرو   مہربانیاں


کون جا کے دسے سونڑے اللہ دے حبیب نوں 

سد لو دوارے اتے دکھیا غریب نوں 

میرے تے ڈیرا بد نصیباں نے پا لیا

سد لو مدینے آقا ﷺ کرو مہربانیاں


ڈاڈا ہاں غریب آقا ﷺ کول میرے زر نئیں 

اڈ کے میں کیویں آواں نال میرے پر نئیں 

تساں تے ہے ڈیرہ میتھوں بڑی دور لا لیا 

سد لو مدینے آقا ﷺ کرو مہربانیاں


آپ ﷺ دے دیدار باہجوں دل نئیں لگدا 

تیر ہے جدائی والا نت سینے وجدا 

انیہاں سوچاں وچ روگ جندڑی نوں لا لیا 

سد لو مدینے آقا ﷺ کرو مہربانیاں


ساری کائنات دا خزینہ مل گیا اے

اللہ دی سوں جنہا نوں مدینہ مل گیا اے

جالیاں دے کول بہہ کے اوناں موجاں مانیاں

سد لو مدینے آقا ﷺ کرو مہربانیاں


در دے سوالیاں نوں خیر جھولی پاؤ نا

گندیاں تے مندیاں نوں سینے نال لاؤ نا

ایہو لجپالاں دیاں عادتاں پرانیاں

سد لو مدینے آقا ﷺ کرو مہربانیاں


جا کے کدی ویکھاں سونڑے گنبد دی ہر یالیاں 

فیر میں نیازی چماں روضے دیاں جالیاں 

اپنا تے رونا سارا میں شعراں وچ سنا لیا 

سد لو مدینے آقا ﷺ کرو مہربانیاں